Quando onte fui a la fuonte de Cabeço Lebreiro, solo andei mais un cachico i staba ne l camino mourisco. Uns cháman-le la carril mourisco i outros bia romana, you siempre le oubi chamar camino mourisco.
Mas yá studei subre esso i andei muitos quilómetros nel. Conheço-lo zde Moncorbo a Spanha i puodo dezir que ye ua antiga bia romana i an alguns sítios inda se puode ber la calçada.
Donde an onde ten cruzes mui parcidas nas ancruzelhadas.
La cruç acerca de la fuonte
Esta cruç era feita de ua piedra sola, mas yá ten un braço quebrado i la parte de riba tamien. Yá muitas bezes se mostrou esta cruç, mas nunca se splicou nada subre eilha i l sitio onde stá. Stá mesmo al lado de la bia romana i nua ancruzelhada que iba para Algoso i Trabanca.
L sitio onde stá la cruç
Yá mais de 25 anhos que le tirei l retrato i a las peinhas que stan cerca. Ampecei a fazer un trabalho subre eilha, mas fui mal tratado, que nun antendi nada, quien era you, sei alhá l que mais. Tube que ir a studar mais para naide me tornar a tratar por eignorante. Mas inda hai por ende quien cuide que sabe todo i ls outros nada.
La peinha acerca de la cruç
Ua parte yá la arrincórun, mas cumo you dezi soutro die, siempre queda algo.
Ls antendidos nun studórun i deixórun stragar l que habie. Mas na parte que quedou puode-se ber que la peinha tenie anscriçones i graburas, andicában la direçon de Sendin i tenie bárias outras graburas que desaparecírun.
Ls graburas que inda se puodan ber
La bia romana ten que ser aporbeitada para se fazer un camino turístico.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
