La tecelaige era ua de las atibidades amportantes de Sendin ne l percípio de l seclo XX i inda hoije hai tecedeiras an Sendin.
Fui hoije a besitar ua, Fátima Xastre, que até yá dou un curso a bárias mulhieres de Sendin. Staba agarrada al sou telar a fazer mais ua pieça de artesanato.
Fátima Xastre ne l telar
Son muitos ls trabalhos que faç, la maior parte por ancomenda i ne ls dies 21,22 i 23 de Márcio alhá stará na Feira de Saberes i Sabores – Arribas an Flor – an Sendin. Ls sous trabalhos son mui aperciados, mas l melhor ye ber l retrato de la sposiçon.
Ls trabalhos
Questuma-se dezir que apuis de la torna ampuosta quien quiera ara. Pus para tecer purmeiro hai que urdir la teia. Ye l que stan a fazer las mulhieres que se béien ne l retrato seguiente.
Las mulhieres a urdir la teia
Este retrato ye de l curso. Cumo se puode ber, la urdidura dá muito trabalho, porque se ténen de poner todos ls filos an orde para se fazer la teia. Tamien para tener ls filos hai que filar i dobar la lana. Ye l que eilha stá a fazer ne l retrato que ben a seguir.
Fatima Xastre a filar
Muitos de bós yá coinceis bien estas cousas, mas nien siempre se mira bien para todo, para que quedeis cun ua eideia de todo i para aqueilhes que nunca bírun, ende bos queda este trabalho.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
