A las bezes las nuobas stan tan cerquita de nós que nien mos damos cuonta. Ben esto a porpósito de un pequeinho testo que li de Amadeu Ferreira.
Roubei-se-lo i bou a screbir-lo eiqui:
“Solo l sfergante ye nuosso. Mas quando çcubrimos esso yá passou i deixou de mos pertenecer. Bendo bien, bibimos siempre ne l passado. Çpreziá-lo ye botarmos-mos para fuora de nós mesmos. Até ls suonhos que tenemos yá fúrun sonhados, nun son feturo. Anton, mais bal bibir sien querer agarrar l tiempo. Respeitá-lo ye oubrar cumo se cada sfergante fura l derradeiro, mas sien que ls sfergantes nunca s'acáben”.
Neste retrato stá todo
Ls retratos son muitas bezes l melhor para dar-mos cuonta de que la bida ye para ser bibida todos ls dies i para ber que l tiempo ye algo que nun eisiste. Somos nós que bamos caminando por un camino sien fin. I an cada sitio bamos deixando l nuosso rastro.
Este retrato mostra un rastro que ye ua lembrancia
Ls que stan nel, al ber-lo ye cumo se stubíssen naquel momiento alhi. I todos nós al mirar para l retrato damos-mos cuonta que l sito inda stá ne l mesmo lugar. Eilhes i nós passemos por alhi. Que cada un deixe por onde passa un rastro de alegrie i de soudade.
Era assi la Trindade
Quien nun parece bibir ls momientos que passou quando fui a la Trindade ne l die de fiesta? La malta, la merenda, ls foguetes, la buolta a la ruoda de la capielha son cousas que stan bibas drento de cada un de nós…
Ende teneis três retratos que son três sfergantes de la bida.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
