Cumo an todas las cousas ls políticos nada dízen a la giente de l que se passa, para apuis beníren cumo salbadores a resolber las cousas, mas a la moda deilhes i de modo a que la giente ande siempre cul gorro na mano.
Mas ls porblemas deilhes i de ls amigos son resolbidos antes i bien.
L IC5 bai a passar mui acerca de la bia romana.
Un cachico de la bia romana
Toda la bia romana era ua calçada cumo se puode ber por este cachico que yá muito tiempo fui stragado, mas de que you guardei l retrato. Inda hai muitos sítios onde se puode ber.
L IC5 bai a quedar bedado i para passar de uns lados para ls outros, solo por passadeiras que tenerán que fazer.
Ua calçada an Sendin
Ls terrenos por onde bai a passar yá stan a ser studados, debeis anformar-bos bien para nun haber porblemas mais tarde. L IC5 ten que se fazer i todos debemos colaborar, mas para esso tenemos dreito a saber antes.
Mirai bien cumo staba bien feita la calçada
Sendin tenie bárias rues cun calçadas de bários modos, mas l tiempo de la Anquesiçon fizo andar Sendin muitos anhos para trás. L ódio i la ambeija que la Anquesiçon truxo por todo l lado, fui cumo yá habie sido cun la peste. Tenemos que daprender cun la stória, solo ounidos seremos grandes.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
