Hoije fui a ber l ancho de Mondin que ampeça a quedar mais pequeinho. Nun ye por ningua rezon grabe, mas porque las obras que ampeçórun nas barraiges de Picuote i Bemposta oubrígan a baixar la auga del riu.
Estas obras bénen traer mais denheiro para Portual, mas cuido que para nós nun bai a ser la maior parte.
Al mirar para l riu lhembrei-me de quando era pequeinho e tantas bezes l atrabessei agarrado a un lhato.
Era por las arribas abaixo, puls carreirones que íbamos até alhá.
Agora fui de carro.
Tirei un retrato a la ribeira de modo a nun se béren ls caminos i parcien mesmo las arribas de dantes.
Las arribas de ls lhados de la ribeira
Onde acaba la ribeira fazírun un ancuradouro para ls barcos. Ye ua cousa buona i todo l Berano serbiu para muita giente meter ls barcos i andar ne l riu. Mas agora cun la chegada de l friu yá nun habie naide.
L ancuradouro
Mas l sitio ye mesmo muito agradable i ne ls dies mais calientes cuido que haberá siempre giente que irá alhá. Ye ua pena que muita giente nunca tenga ido a ber. Ls sendineses ténen que saber melhor l que tenemos. Por esso you mostro las cousas, para cada beç mais tenermos ourgulho na nuossa tierra.
L riu onde entra la ribeira
