Fui ne l die 18 de Novembre de 1921 que la seleçon nacional de futebol jogou l purmeiro jogo. Ben esto a perpósito de hoije se haber jogado l jogo antre Pertual i Spanha i que la nuossa seleçon de sub-21 ganhou por 4-1. L e jogo de 1921 fui antre la seleçones maiores i la Spanha ganhou nesse tiempo por 3-1.
L jogo de sub-21
Tamien ye amportante, por bezes poner estas curjidades para mos darmos cunta de cumo las cousas demudan, mas cumo se questuma dezir de ls pumientos, siempre dan al que son. Las cousas demudan, mas la bida ye bida i ye an funçon de la perserbaçon de la bida que todo l mundo gira.
La seleçon pertuesa de 1966
Pertual yá fui grande i yá passou por deficuldades, siempre assi fui i cuntinará a ser. Uas bezes peras i outras pericas. Mas inda hai ls que stan solo a ber las cousas malas i nunca se dan cunta de tanta cousa buona. Manhana será outro jogo de Pertual, mas contra l Brasil. Para Pertual jogar cun l Brasil tenerie que pagar i hoije ye cumbidado. I cousa nunca antes eimaginada, un pertués ye cunsiderado l melhor de l mundo.
La claque de Pertual
I yá que stamos an die de lembrancias, deixo-bos este pequeinho testo de l Pe. Mourinho, que mos debe fazer pensar:
Eiqui bibiu Pertual zde la purmeira hora, pur eiqui naciu i pur ende abaixo se botou…antrou ne l mar i dou boulta al mundo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
