Chega l fin de Nobembre, l friu ampeça a apertar i ls trabalhos fura de casa ban sendo cada beç mais ralos. Apanhar azeituna a nun ser para l’ambarque, quir dezir, para bender para la cura, inda nun ye tiempo. Cumo diç l dito: quien apanha l’azeituna antes de l Natal deixa l’azeite ne l oulibal . Mas hai siempre ls aflitos que nun s’ampórtan i ampéçan antes.
L lume
Mas cumo l friu yá se sinte bien, hai que fazer lume lougo cedo, porque ls dies ban tamien sendo mais pequeinhos. Mas ye tiempo de fazer outras cousas, cumo l’augardiente. L bagaço de la pisa quedou a fermentar uns dies i cumo se ten que tirar tamien l repiso de l pipo que siempre ten algun bagaço ou borras, hai que fazer la augardiente.
A tirar l bagaço de la cuba
Quantos bos lembrais inda de fazer la augardiente? Cun borralho baliente por baixo de la alquitara i sentado a la borda, iba-se fazendo la augardiente. Ultimamente yá nin borralho ye perciso, porque hai modos de sustituir la leinha. Ye mais prático, mas yá nun dá para assar uas patatas ou un cacho de chicha i até ua cebolha.
La alquitara a stilar
Stou mesmo a ber muitos a lembrar-se de l die an que fazien l’augardiente. L’augardiente inda faç falta, porque ten muito uso, para las medicinas caseiras, para ls doces, para las tripas de ls cochinos, anque se ban a anchir ls chouriços i para beber a la purmanhana, ou apuis de comer. Nun bamos a dezir que faç mal, porque mal faç todo l que ye de mais. Cun regla nada faç mal.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
