Hoije ampeçou an Sendin l’ ancontro de la semiênte , ourganizado por la associaçon “ Colher para Semear” i bai a cuntinar manhana. Bino giente de toda parte, son centenas de pessonas que pássan dous dies an Sendin a daprender las culturas tradicionales i a coincer las semiêntes, que fúrun eidenteficadas durante mais de un anho, an todo l Praino.
La mesa de ls palestrantes
José Miguel a apersentar l trabalho
La giente anchie l salon
José Manuel Fonseca, membro de la associaçon, andou por todo l Praino a ber, studar i reculher las semiêntes i a retratar todas las culturas i téquenicas de cultibar ls pordutos. L’ancontro serbiu para mostrar todo l trabalho feito i ls retratos. Fúrun inda cumbidadas pessonas para falar subre las culturas i de l modo cumo se faç cultura biológica.
José Almendra a falar de las castas de las ubas
Ua casta de ubas – l bastardo
Purmanhana, fúrun las palhestras i José Almendra falou de las castas de las ubas tradicionales i de la sue amportância ne l passado, persente i feturo. Cun l salon de la Junta a abarrotar de giente, fui un berdadeiro sucesso l’ancontro. A seguir falou Ana Maria Carvalho subre la agricultura, dibersidade i susteniblidade – las bariadades locales son muito mais que repositórios de genes.
Ana Maria Carvalho a fazer la sue palhestra
Ne l salon mal se cabie
Apuis de l’almuorço falou Miguel Nóvoa subre la raça asinina i fizo ua presentaçon, que mereciu l’anteresse de muita giente. Antre ls persentes habie pessonas formadas an bariadas áreas, uns que benírun fazer la reculha de anformaçones para las sues teses de mestrado i doutoramento i outras por séren antusiastas de todo l que trata de l biológico i de la defênsia de l’ambiente.
Miguel Nóvoa a falar
A las três de la tarde fui ua besita a ua huorta i na marrielha podírun daprender a arar i a ber las plantas de las arribas. Muitos aporbeitórun para dar un passeio por las arribas i ber l riu i las abes selbajes. Fazírun-se percursos a pie i de jeep. Besitórun l Picón de ls Arteiros, la fraga bigorna i mirórun para Faia Bintureira. Outros fúrun a Forcaleiro i als Pisones.
La fraga bigorna
L Sponer de l Sol bisto de l Picon de ls Arteiros
Cuntinou a la nuite, ne l salon de la Junta cun l baile de las colheitas i cun l grupo de gueiteiros: Lenga Lenga i Carlos Ferreira a cuntar cuontas mirandesas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
