L die d’hoije de l ancontro de semiêntes fui durante toda la manhana para ls partecipantes daprendéren bárias cousas i para alhá de ls ansinamentos teóricos, houbo trabalho prático, para todos béren cumo se fázen las cousas i l resultado de l que daprendírun. Por esso houbo oufecinas, na casa de la Junta, cun pessonas a ansinar a fazer bárias cousas.
José Miguel a ansinar a reculher las semiêntes
Ls porparatibos para tirar la semiênte de tomate
Cumo téquenicas de reculha, ansinou a tirar las semiêntes por l método seco i cun houmidade i tamien ansinou a cunserbar i a selecionar las bárias bariadades. A seguir Maria Adília Parreira ansinou a fazer xabón, Quedemos a saber que un pouco de alecin l daba un olor agradáble al xabón.
Maria Adília a mexer la mistura de l xabón
Yá parece xabón
Habie bárias studantes de las ounibersidades, pertuesas i de outros paízes a tirar apuntamientos. Violeta Aleixo ansinou a fazer licores i cumpotas de la nuossa region. Para acabar ls trabalhos de la manhana houbo ua mesa redonda subre l trabalho antre las pessonas de acá i de alhá de la raia, cun la partecipaçon de giente de Spanha.
Violeta a splicar cumo se fázen ls licores
A la tarde houbo ua MESA DE AGRICULTORES SÁBIOS i cumo nun podie deixar de ser alhá staba Abílio Paxareiro.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
