Screbir todos ls dies ua nuoba nun ye nada fácele, inda que seia solo un pequeinho comentairo ou un retrato i hai que ancuntrar cousas que puoden tener algun anteresse. I la nuoba d’hoije puode tener algo a dezir a muitos sendineses. Ne l anho 1980/1981, cumo porsor, na scuola de Sendin, recebi a José Saramago i a la sue mulhier desse tiempo, Isabel da Nóbrega, na mie sala.
José Saramago
Scribo hoije esto, porque José Saramago faç hoije 86 anhos. I querie eiqui deixar esta lembrancia, porque el i la mulher falórun cun ls alunos i falemos de la amportancia de screbir i ler. Fazimos apuis deilhes salíren alguns trabalhos, naquel tiempo naide pensarie que stubo alhi un feturo prémio-nobel de la literatura.
La medalha de l prémio Nobel
La besita nun acunteciu por acaso, ye que la telbison habie feito ua mesa redonda cun un porsor de cada grau de l’ansino. L repersentante de ls porsores de las scuolas primárias fui l porsor Almendra i la moderadora de la mesa-redonda subre l ansino fui Isabel da Nóbrega. You mostrei para todo l paiç l jornal de la nuossa scuola i an slides mostrei cumo se fazie.
L jornal desse tiempo
De todo l paiç screbien para la nuossa scuola i mesmo de Francia teniemos scuolas que passórun a fazer trabalhos cun ls nuossos alunos. Isabel da Nóbrega quijo besitar la mie scuola, quando acumpanhou José Saramago na sue biage por Pertual, ancumendada por l círculo de ls leitores, para screbir l sou libro Viagem a Portugal. I Sendin i la puosta mirandesa, quedórun ne l libro.
Ls que recebírun l prémio Nobel an 1998
Ls trabalhos de ls alunos de l anho 1980/1981 corrírun mundo i ne ls anhos seguintes faziemos un filme que passou an muitos paizes de l Cunseilho de la Ouropa, cumo decumento pedagógico.
José Saramago , un de ls scritores pertueses mais coincidos ne l mundo, recebiu an 1996 l prémio Camões , l mais amportante prémio literário de léngua pertuesa i an 1998, l prémio Nobel de la litratura.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
