Muita giente faç trabalhos de ambestigaçon i anda por ende a screbir subre ls jogos tradicionales. Outros fázen-los an dies nomeados para ls mais bielhos i la maior parte de las bezes, para ganháren denheiro cun esso ou para ganhar galardones, mas pouco s’ampórtan culs jogos.
A daprender l fito
La raiola
Nas scuolas de Sendin, alguns porsores ban ansinando ls moços i moças a jogáren ls jogos tradicionales, ye desso que bos dou cunta. L HOIJE yá ten ido alguas bezes a las scuolas i cunsante l tiempo de l anho assi ten ancuntrado ls porsores a ansinar ls jogos ou ls alunos a jogáren. Hai jogos para cada tiempo de l anho.
A saltar la cuorda
Andar apeado
Para ls mais bielhos querie, para alhá de bos lembrar alguns jogos de l buosso tiempo de garotos, pedir-bos que als buossos filhos ou nietos, l faleis desses jogos i ls ansineis. Quedáren por ende, an libros, retratos ou cd’s ye buono, mas melhor será que pássen de pais para filhos.
Onde stás? An gametas.
Jogo de eiquelíbrio i cuncentraçon
Poderie poner eiqui ls retratos que tengo tirado cun ls garotos de las scuolas, mas cuido que ye melhor fazer-bos pensar a todos. Al ler l nome dun jogo, cerrai ls uolhos i eimaginai cumo era. Cuntai, amostrai cumo era als mais nuobos i bós ls mais nuobos, preguntai por estes jogos als buossos pais ou abós i ides a ber cumo çcubris muitos mais.
-Arranca nabiça
-Sconde sconde (inda bos lembrais de todo l que se dezie?)
-Salta bomba
-L fito
-Saltar la cuorda
-Las necras
-Uã da mula
-Barra manteiga
-Romeu Romeu
…..
Stou mesmo a oubir-bos falar de tantos outros de que nun falei d’aprepósito.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
