Este nun ye un anho buono de castanhas, mas ls porsores i alunos de todas las scuolas de Sendin i alredores fazírun l magusto cumo todos ls anhos. Para ls maiores l magusto yá nun tubo l anteresse d’outros anhos. La bida bai demudando i las motibaçones son outras. Son ls mais pequeinhos que inda quédan todos cuntentos cun las castanhas assadas.
A çtribuir las castanhas als mais pequeinhos
Las porsoras de la scuola anfantil fazírun un trabalho mui anteressante cun ls alunos i ne ls dies antes, falórun de las castanhas i de l magusto i ls trabalhos manuales tamien fúrun subre las castanhas. Fazírun deseinhos i até pacotes cumos ls que fázen ls bendedores de castanhas, por las rues, solo que estes teníen l nome i éran anfeitados.
L cartucho staba lindo
Ls garotos stában felizes
Mas ls maiores, l que queríen era comer i cumo podeis ber por ls retratos, tamien habie sardinas assadas, febras i caldo berde. Las ampergadas tubírun bastante trabalho, mas baliu la pena, porque todo corriu bien. Inda houbo alguns garotos que se anfarruscórun, mas yá nun le tirei l retrato porque tube que me ir ambora mais cedo.
Nun se bos antolha?
A estes l caldo berde parece que le sabie bien
Mas ls porsores i ampregados tamien comírun bien. Que para l anho haba mais i que todos ls que inda porqui stubíren que nun se squéçan de fazer l magusto.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
