Ne l die de San Martino ajuntában-se ls amigos i ala a porbar l bino nuobo. Quaije que toda la giente fazie un pipo de bino, lougo cedo i por este tiempo yá iba cortado. Tamien habie ls que al fazer l bino, fazien un pipote de repiso, para beber al cedo. Hoije yá poucos l fázen i ban a cumprar-lo a la Copratiba.
La proba de l bino de la Copratiba
La Copratiba, yá uns anhos que ne l die de San Martino, faç ua proba de bino nuobo i dá castanhas assadas als associados que quejíren. Este anho fui ne l salon de la Junta de Freguesie, a la tarde, mas bebiu-se mais de l bino bielho, porque l nuobo inda nun staba bien cortado.
Las castanhas
A tirar l bino de ua nuoba ambalage
Até para meter l bino ban aparecendo nuobas ambalages i ls garrafones ou ls pipos, ban quedando squecidos. Cumo podeis ber por l retrato, la ambalage ten torneira i todo. Ye ua cousa mais fácele de usar, mas siempre hai quien querga las cousas a la moda mais tradicional.
Tamien habie outras cousas para comer
L cumbíbio ye siempre buono, mas la giente yá pouco se amporta cun estas cousas i tamien yá nun se bebe bino cumo d’atrás. La giente bai tenendo miedo de abusar i tamien hai mais bebidas que ban sustituindo l bino.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
