Carçon --- 0
Mais un jogo de l Çtrital de futebol de la AFB i l Sendin ganhou por 1-0 , acabando cun la mala suorte de ls últimos jogos. Este anho mais parecie l anho an que l Sendin mudou de las eiras para l campo que ten hoije. Nun habie modos de ganhar un jogo i nesse tiempo dezien que era l campo que staba ambruxado, até fazírun rezas i todo, mas agora solo fui perciso l Sendin jogar l que sabie.
L Sendin dominaba l campo todo
L Sendin fui mais fuorte
Lougo al ampeçar l Sendin jogou cun ganas de ganhar i parecie que tenie mais logadores cumo se puode ber por l purmeiro retrato i fui mais fuerte an todo, mas nun habie modos de marcar un golo. Mas tamien nun deixaba l Carçon chegar a la nuossa baliza i l anterbalo chegou cun 0-0 .
La bola andaba pul aire
L Carçon defendie-se cumo podie
La segunda parte ampeçou cun ls jogadores de l Carçon a la defênsia i la bola mais parecie andar lebada por un pulborino i ls jogadores cumo se puode ber ne l retrato, andában mais a mirar para l aire que a jogar. Mas la giente ampeçou a animar la nuossa eiquipa i esta forçou l jogo i nun libre acabou por fazer l 1-0 .
L libre de que naciu l golo de l Sendin
L Sendin ne l contra-ataque
Apuis de l golo, l Carçon tentou ir para lantre, mas l Sendin fui siempre mais peligroso, yá que ls nuossos jogadores aporbeitában l adelantramento de l Carçon, para fazer jogadas peligrosas de contra-ataque. L resultado nun se altarou até al fin, mas l Sendin merecie mais un ou dous golos.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
