Mas que nuoba será esta i que quererá dezir esso de património eimaterial , poderán pensar alguns, mas sei que hai tamien quien saba mais que you, l que ye esso. Mas la nuoba ye l que amporta i you nun puodo dezir mais do que aqueilho que sei. Património marerial son las casas, las tierras, ls castielhos, las puontes….las cousas que se puodén apalpar, l património eimaterial son las cuntas, las stórias, la litratura, la léngua,…cousas que ls nuossos antigos mos deixórun tamien i que nós debemos guardar i deixar als mais nuobos.
L Pe. Mourinho
Quando hai essa cousa a que cháman “ Fundos comunitários” , ls gobernos, las câmaras, las juntas i ls antendidos nessas cousas; que nin toda la giente sabe ir als Fundos , porque para esso hai que tener scuola; trátan de fazer porjetos para outelizar l denheiro desses Fundos . Para l Douro hai 37,5 melhones de euros para gastar. Desses porjetos faç parte un a que cháman “ Rota de escritores, pintores i outros artistas que nasceram, trabalharam ou viveram no Douro” .
Trindade Coelho
Cumo l Douro, an regla ye solo cunsiderado zde l Pocinho até al Porto, l HOIJE ten la oubrigaçon de dar esta nuoba i alertar para que l Douro seia cunsiderado até Paradela. I you mostro-bos hoije trés de ls nuosso maiores scritores, mas muitos mais hai i tan ou mais relebantes que estes.
Guerra Junqueiro
La rota tenerá que cuntar cun la besita a la tierra destes scritores i al sitio onde nacírun i ou fúrun anterrados. Stou yá a ber aparecer ls antendidos a dezir que tratórun de todo i a pedir un galardon, nun ye desso que se trata, ye de trabalhar para que quede alhá, na rota, todo l nuosso património eimaterial, sien squecer la nuossa léngua i l Sendinés , que ye tamien un de ls maiores patrimónios de l Douro.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
