Poucos se amportórun an dar eideias a quando de l studo ambiantal de l porjeto de l IC 5, que stubo na anternete muito tiempo. Agora yá stá feito l cuncurso, las obras yá ban a ampeçar, mas poucos sáben por onde bai a passar i ls porblemas que ban a aparecer. You stube atento i nun me bou a queixar, spero que ls de l questume, nun benga apuis a ampatar a quien trabalha.
Ye porqui que bai a quedar la salida para Sendin
Habie dues bariantes i durante muito tiempo stubírun an çcuçon pública, na anternete i na Junta de Freguesie. Hai quien se preacupe a achar un erro ou ua mosca na anternete, mas de l que diç respeito a todos nin sabe onde ir a ber. Apuis bénen cun sabedories de garotos de scuola a dar reitólicas que nun son mais que mofas de l lume.
Porqui passará, al lado de la strada romana
I bai camino de Prado Gaton
La strada bai a tener de ls lados, ua rede para nun podéren passar ls animales maiores que un pequeinho rato. Mas de 500 an 500 metros mais ou menos, aporbeitando las linhas d’auga ou outras que se farán, ancluindo passaiges por riba de la strada ou por baixo, haberá passaiges para ls animales maiores podéren andar de un lado para l outro.
Passará tamien cerca desta cruç
L studo cuntou até cun l studo destes locales i inda cun l modo de facelitar la passage de ls jabalis i de ls beados, lobos i raposas. Para la gente habeá caminos paralelos a la strada para acesso a las sues tierras. Alguns colaborórun i sei que haberá siempre ua ou outra falta, mas ye cun tiempo que se dében falar las cousas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
