Cuido que esta ye ua nuoba que ye mui amportante para todo l Praino i para Sendin tamien. Ampeça na Segunda a funcionar la hemodiálise nesta ounidade de salude, l que bai a benefiiar ls sendineses que stan a fazer hemodiálise, porque yá nun ténen que ir para Bregancia trés dies por semana. Mogadouro siempre ye mais cerca.
La ounidade de salude por fuora
An drento
L HOIJE stubo alhá a besitar las anstalaçones i a ber todo, para bos dar mais esta nuoba de algo de buono que se bai fazendo. La ounidade de salude ye pribada l que ben mostrar que inda hai quien aposta nesta region. Palradores hai muitos, mas quien faga obras ye l que nós percisamos.
La sala de hemodiálise
Por l que mos fui dito la ounidade bai a tener serbício de análises i de RX i inda cunsultas de bárias specialidades clínicas. Yá nun bai a ser perciso de ir loinje para fazer muitos eisames, que hoije nun ye possible fazer. Son muitos ls erros de ls políticos i l maior fui nun se haber feito un Spital an Mogadouro.
Ua sala para fazer la hemodiálise a la hora que l doente querga
Cada beç se ban scobrindo nuobas cousas i yá cada un puode fazer la hemodiálise a la hora que melhor antender i para esso sírbe la sala que bos mostrei. Ls doutores ye que ban a dezir als doentes cumo dében fazer, mas ye amportante haber todas las possiblidades. Para alguns doentes hai la possiblidade de cun l apoio de la clínica, fazer-la mesmo an casa.
La sala de tratamento de l’auga
Un de ls maiores cuidados a tener ye cun la auga que se bai a usar i la ounidade de salude ten ua anstalaçon para l tratamento i filtrage de l’auga.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
