Realizórun-se ls eisames de l 9º. anho i la nuossa scuola tubo buonos resultados, l que ben mostrar que se trabalha bien. Alunos, porsores i ampregados, stan de parabienes porque fazírun cun que la nuossa scuola quedasse an 3º. antre las 21 scuolas de l çtrito. L HOIJE stubo alhá a fazer ua reportage, hoije por la manhana.
L anterbalo tamien sírbe para treinar
Cumo chobie, la maiorie assistie als treinos
Para quien nun se preacupa cun la scuola ou nun puode acumpanhar l trabalho de ls nuossos porsores i moços i moças, puode ber na nuoba d’hoije un pouco de l que se faç. Solo cun trabalho i ganas de trabalhar por parte de todos, se cunsíguen buonos resultados. Houbo eisames an 1292 scuolas, an Pertual anteiro i la nuossa quedou an 296.
Ua aula de matemática
L apoio a alunas cun mais deficuldades
Quedar an 3º. antre las scuolas de l çtrito i antre 1292 de Pertual, quedar a la frente de quaije 1000 ye algo que mos puode deixar ourgulhosos. I estes porsores nun ándan a gabar-se, trabálhan i móstran resultados. Cumo podeis ber por ls retratos, la porsora Ção Cacharulo, porsora de matemática, ten un plano de ajuda a las alunas cun deficuldades i alhi stá outra porsora a ajudar.
L personal de la secretarie
Mas ls resultados, son tamien porque l personal ouciliar ye cumpetente, yá que ua scuola ten hoije muitos porblemas i ten que haber un buono antendimento antre todos. Mas ls pais i alunos ténen ua buona relaçon cun la scuola i nun se puode dezir que ye porque stamos nun sitio fácele. Eiqui tenemos alunos de etenie cigana i alunos de ua anstituiçon de acolhimento de moças an risco.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
