Hoije fui die de taça de la Associaçon de Futebol de Bragança. L Sendin recebiu l Morais, eiquipa que ne l anho passado stubo na 3º. Debison i que mantén la maiorie de ls jogadores, que cun la sue spriência, benírun para ganhar l jogo, yá que este anho ténen cumo oujetibo ganhar la taça.
L Morais a comemorar l sou golo
L Morais ampeçou lougo a jogar mais, cun jogadores mais fuortes i sprientes i als 20 minutos yá ganhaba por 1-0. L Sendin nun se deixou assustar i fui als poucos eiquelibrando l jogo i quando chegou l çcanso, l Sendin tenie l jogo eiquelibrado.
L Morais era ua eiquipa mais fuorte
Na segunda parte de l jogo, l Morais cun la sue melhor quelocaçon ne l campo, yá que era ua eiquipa que benie de la 3ª. debison, soubo cuntrolar l jogo. Mas l Sendin fui melhor que na purmeira parte i poderie tener ampatado l jogo, mas nun tubo ua pequeinha ajuda de la suorte para l poder fazer.
L Morais tenie melhor quelocaçon
L Sendin fui melhor na segunda parte
Ne l fin l resultado quedou 1-0 para l Morais i hai que l aceitar se bien que l ampatate nun stubisse mal. L árbito fizo ua buona arbitrage i quando assi ye todo acaba bien.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
