Ye manhana l die de lembrar ls muortos, yá que hoije ye l die de todos ls santos, esto ne ls paízes crestianos, porque nun ye assi an muitas partes de l mundo. Inda hai giente que nun antende l que ye relegion ou acraditar an Dius. Esso ye ua cousa de cada pessona i que todos debemos respeitar.
Estas son las flores que mais se úsan
An Sendin i porque l die 1 de Nobembre ye die santo de guarda, las pessonas i la eigreija, passórun a comemorar ne l die d’hoije, l die de ir al semitério i rezar alhá la missa por las pessonas muortas, an special por las sendinesas. Muita giente ben neste die a Sendin para lembrar la sue familhia. Tamien hai ls que nunca fazírun ua besita al semitério i este nun ye solo de ls crestianos.
Lougo por la manhana ban a porparar las foias
L culto de ls muortos eisiste ne l mundo zde melhares de anhos, inda antes de haber crestianos i desso son proba, las piedras scritas que se ténen ancuntrado por todo l Praino, a cubrir las foias de pessonas que bibírun ne l tiempo de ls Zoelas i de ls Romanos, pobos que bibírun porqui antes de Cristo haber nacido.
A la hora de la missa, para ls que nun podírun benir.
Cumo por toda la parte, an Sendin, siempre houbo pessonas que nun acreditan an Dius i que ténen outras relegiones i nun ye por esso que son menos sendineses, mas inda hai ls que nun acéitan esso, assi cumo hai ls que ténen rábia als cristianos – son pessonas que nun ténen cultura – debemos tener pena deilhas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
