Assi cumo la rádio i la telbison ban a bários sítios, tamien l HOIJE fui a la cidade. Hai giente que queda cuntenta cun l mal de ls outros, mas nunca debemos desear l mal al nuosso bezino, porque l nuosso ben a camino. La salude ye la cousa de mais balor que podemos tener, mas inda hai quien tenga falta deilha.
La cidade cun bida i salude
Son bastantes ls sendineses que ténen que ir a la cidade a porcurar remédio i l HOIJE tamien debe dar nuobas desso. Ye que hai quien solo pense ne ls porblemas de l denheiro ou de la politica i nun dá balor a las pessonas i als sentimentos. Tamien you fui a la cidade i bi l que ye nun tener salude.
La cidade que muitos nun beien
Fálan an Dius i an liberdade, mas nun anténden nin ua cousa nin outra. Será que Dius ye cumo un desses atiradores, que éntran nua ounibersidade i mátan sien mirar a quien? Será que liberdade ye querer que esse Dius regule la nuossa bida? Mas quien somos nós para julgar ls outros? Un pouco de Houmildade faç tanta falta.
Mirei para l cielo, parece que inda hai quien cuide chegar alhá
L cielo que you bi, nun passa de ua cousa sin fin onde nunca se chega, mas hai un cielo cuncreto que ye l camino que andamos neste mundo i que se l seguirmos i tratarmos bien, yá ye cielo i será siempre anquanto bibirmos.
Fui mirando para lantre que cuntinei caminando
Mas era tiempo de tornar i la carreira speraba para mos traer de nuobo a Sendin. Manhana ye l die de las bruxas. Nun creio an bruxas, mas que las hai,hai….
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
