Acabada la trilha, lebában-se las mulas i las burras para las eiras ou iba-se culhas por ls restrolhos i ls garotos antreteníen-se a caçar páixaros i las garotas apanhában spigas para las pitas. Apuis benie la bendimia i la sementeira i esta tamien era feita por juntas de bacas ou de buis. An Sendin houbo siempre mais mulas para trabalhar.
Inda hai mulas i burras para cumprar
Las bacas i ls buis cumo éran de giente mais rica lebában-los para ls lameiros i l boieiro, era quaije siempre un criado de serbir. Hoije yá hai poucas mulas i burras i las bacas yá son mais para dar bitelos ou leite. Yá nun hai eiras i las bacas yá pouco sálen. Las bacas mirandesas yá son poucas, mas inda se ban bendo por ende.
Las bacas mirandesas
Ls labradores yá ténen bacas de muita culidade i la maiorie ten-las an stáblos i ls poucos que las líeban a pacer, até yá nin a pie ban. Subidos ne l sou trator alhá ban atrás de las bacas i mesmo ls que ténen mulas, las lieban presas al trator.
Estas nun son mirandesas
Quando tanto se fala an culidade i certeficaçon de ls pordutos de la tierra, pouco se faç por anformar i ajudar ls labradores. Mesmo quando queremos fazer-lo, ls que inda bamos sabendo por spriencia, lougo aparécen “doutores i angenheiros”que nunca bírun ua baca ou que se quieren amostrar, a tirar la deboçon de fazermos algo.
I you ye que tengo la culpa?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
