Este anho ls Grazes fúrun ne l último fin de sumana de Outubre i bai a ser assi zde este anho para lantre. La feira fui mui grande, yá muitos anhos que nun se fazie ua feira cumo esta. Fúrun dous dies na que nun faltórun bendedores nin cumpradores. L die stubo de Sol i fui ua berdadeira feira a la moda antiga.
La feira bista de ls barriales
Ua rue chena de giente
Cumo todos ls anhos habie de todo a bender i nun faltórun ls burros, hai que lembrar que la feira de Sendin tamien era coincida cumo la feira de ls burros. Ne l fin de las sementeiras era mui amportante esta feira, para la renobaçon de la cria, burros i mulas, i tamien para fazer las compras para l Ambierno.
L sitio onde se bendien ls burros
Nun bou a falar de todo l que se bendie, mas quiero mostrar-bos ls retratos de un spetáclo amportante, que fui la mostra de ls burros bien aparelhados i cun las bárias moças i moços bestidos a la moda antiga. Tamien podeis ber las alforjas i las mantas que se usában d’atrás.
La mostra de burros
Ua moça bien bestida
Alguns burros tamien lebában ls cestos de cargar ubas i figos i até leinha. Esta mostra percorriu la feira de ua punta a la outra, cun ls gueiteiros a tocar a la frente. Fazírun muitos filmes i tirórun muitos retratos. La mostra, mais parecie ua sposiçon de cousas tradicionales, era un museu bibo por las rues de Sendin, onde se fizo la feira.
Aquilino Ginjo i la filha acabalho nua burra
Dues moças de la AEPGA
Ye esto Sendin, ua tierra de ancanto i beleza, cumo diç l hino antigo de Sendin.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
