Na casa de la cultura de la Junta de Freguesie de Sendin ancontra-se ua sposiçon de trabalhos de las casas de ls bielhos de l cunceilho. Son trabalhos de la Mesericórdia de Miranda, de l Lar de Sendin, de l Lar de San Martino i de l Lar de Picuote.
Ls trabalhos de l lar de Sendin
Uas botas
Ls trabalhos fúrun feitos por ls bielhos ne ls tiempos de oucupaçon. Ye mui amportante tener ls bielhos oucupados cun bárias atibidades i para esso era amportante que ls lares tubíssen mais téquenicos de las bárias cousas, para ls tenéren oucupados. Yá un die l HOIJE bos mostrou ls bielhos de l lar de Sendin a daprender a screbir i a ler.
Ls trabalhos de l lar de San Martino
Ls trabalhos de l lar de Picuote
Ls trabalhos de artesanato son amportantes porque ye tamien ua maneira de perserbar cousas que yá ban squecidas. Era tamien amportante haber ua eiquipa que fazísse un trabalho de recolha de testos, cuontas, usos i questumes de la bida de atrás i que ls bielhos poderien ansinar.
Ls trabalhos de la Mesericórdia de Miranda
Ls trabalhos de la Mesericórdia de Miranda son tamien de l lar de Palaçuolo, que ye de la Mesericórdia. Nesses trabalhos podemos ber alguns retratos de pessonas, yá mui antigos. Se tubírdes un pouco de tiempo nun deixeis de ir a ber.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
