Na scula de Sendin ls alunos de la porsora Ção daprendírun a fazer marmelada i cumo nun podie faltar, l HOIJE stubo alhá a ber todas las ouperaçones que hai que fazer. Ampeçou-se por tirar l retrato a todos ls alunos i apuis ye que se porparórun las cousas para fazer la marmelada. La balança tamien staba pronta para se saber l peso de la massa.
Ls alunos i la porsora
La balânçia
Purmeiro çcascórun-se ls burmielhos i apuis de l tirar l caroço, de ls partir an cachos i de labados, pesórun-se para se saber l açucre que debien lebar. Todo este trabalho fui feito por ls alunos i fui aporbeitado para falar de ls fruitos, de la heigiene i fazírun-se las cuntas subre l peso de la massa i de l açucre.
A çcascar ls marmielhos
A labar ls cachos
A seguir botórun ls cachos nua panela cun ua pouca d’auga i ponírun-los al lume. Anquanto la panela staba al lume íban mexendo para quedáren cozidos sien se queimáren i apuis de cozidos, ajuntórun-le l açucre i zmagórun-los i quedou ua massa a ferber mais un pouco até spessar i quedou feita la marmelada.
A botar ls cachos na panela
A mexer la massa
Feita la marmelada, solo fui meter-la na pequeinhas caixas para arrefecer i quedar mais dura. Inda caliente todos porbórun i a mi dórun-me ua caixa para porbar i solo bos puodo dezir que quedou buona. Yá sei que ls alunos ban a ber l HOIJE, porque solo le dezie se staba buona al poner la nuoba. Lougo ls abisei que tenien que saber ler sendinés.
La marmelada an caixas
Ye assi que se bai debulgando la nuossa léngua i se ban tornando ls nuossos garotos felizes.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
