Cumo yá bos dixe, hai muita giente de outras aldés que me piede para poner tamien nuobas dalhá i que scriba an mirandés cumo siempre fago, porque dízen que anténden bien. Quando l pergunto porque dízen esso, arrespónden que ye porque nun outelizo palabras mui çcoincidas. Muitas bezes tengo que splicar porque scribo alguas, mas gústan de ler.
Ua bista de Palaçuolo
La eiquipa de la câmara que stá an Sendin, cumo bos dixe onte, anda a trabalhar an Palaçuolo. L HOIJE fui alhá a ber l que andában a fazer. Quando cheguei a la obra pareciu-me que era ua casa i que nun serie cousa mui amportante, inda mais ne l sitio onde era.
La obra bista de la parte de baixo
La eiquipa a trabalhar
Chegou l persidente de la Junta de Freguesie i splicou-me l que íban a fazer. Cumo teníen alhi aqueilha casa que queda onde se faç la fiesta i onde stá l jardin. I cumo tenien necidade de uas casas de banho públicas, para la giente nun tener que ir a fazer las necidades por onde quiera, aporbeitában fazer alhi obras i fazien las casas de banho na parte de baixo.
La casa bista de l’outro lado
Cumo por la parte de riba quedaba outra rue, al nible de la placa, fazien un armazén para guardar cousas de la Junta i ua garage para meter ls carros. Cuido que ye ua buona eideia, mas las obras nunca stan a la moda de toda la giente.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
