L HOIJE alhá bai andando i bendo i mostrando i screbindo para melhares de Sendineses i cada die son mais ls que léien l HOIJE. Tamien bos puodo dezir que son tamien muitos ls que de outras tierras, todos ls dies léien l HOIJE.
La rue antre l LAR i la obra de l arranjo de las Eiras
La rue yá bai cumpuosta i las obras de l arranjo de las Eiras tamien ban andando bien, contra la crise Sendin nun para i solo queremos que cada un faga mais uns forço para que l trabalho nun falte. Por cada un que zanima hai dieç que cuntínan.
La auga i l saneamento yá chégan al Bergel
Era ua necidade poner auga i saneamento até al fondo de l Baiunco. La eiquipa de la Câmara que tenemos an Sendin i que speramos cuntine siempre, fui ua de las melhores cousas que bino para Sendin i por l que l HOIJE puode ber, ten feito un buono trabalho, colaborando cun la Junta i las antidades de Sendin i alredores. Hoije stubo a trabalhar an Palaçuolo.
La capielha de l semitério an obras
Tamien la fabriqueira anda a fazer obras na capielha de l semitério. Cumo ls azuleijos íban stragados, stá a ser reparada toda la capielha i la frente, an beç de azuleijos, bai a quedar cun piedra. Ye esto que la giente quier saber, ber i ler. Por esso l HOIJE ten tanta besita.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
