Acabados ls trabalhos de fin de Berano i cun la chegada de l tiempo mais friu, por todo l Praino las pessonas yá nun se deitában tan cedo i a la nuite ampeçában las beladas, até porque era un modo de gastáren menos leinha, ajuntando-se a belar, ne ls purmeiros dies, ne ls currales i mais tarde nas cozinas.
Las antradas antigas
Estas stan recunstruídas
Alguas casas tenien un curral cun uas portaladas i an drento desse curral ye que quedában las casas onde moraba ua ou mais familhias. Esse curral serbie para arrumar la leinha i tamien para tener las casas mais arreculhidas de l aire. Por outro lado habie ua maior antemidade de ls moradores.
Un curral amanhado d’agora
Serie amportante fazer un trabalho subre ls currales, mas era no meio de l curral que se fazie ua fogueira i alredor la giente ajuntaba-se a belar. Las ties tratában de la lana i del lino i filában, anquanto ls homes porparában ls artimanhos mais lebes, cumo aguelhadas,trasgas, forquilhas…Era tamien quando se cuntában ls cuontos tradicionales, ls rimances i las cantigas.
An drento bei-se la casa
La cozina
Muitas bezes ansaiában-se las danças i ls pouliteiros. Hoije la telbison i ls cafés ban sustituindo las beladas, mas inda bai habendo la tradiçon de fazer serones i inda se ajuntan familhias a passar l seron.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
