Apuis de acabar l trabalho de la bendima i de la Copratiba haber acabado cun la receçon de las ubas, cun todo arrumado i limpo pagou-se a quien trabalhou i cumo todo corriu bien i na Copratiba ls trabalhadores son respeitados i ye reconhecido l sou trabalho, fizo-se un cumbíbio cun ls que fazírun la campanha.
Ls moços i moças
Ls moços i moças
Fúrun ls própios moços i moças que trabalhórun na Copratiba, que quejírun fazer un jantar cun la direçon i ls téquenicos. Quando tanto se fala de ls nuobos ye amportante dezir que fui un grupo de moços i moças que fazírun todo l trabalho i algun bien defícele. Tambien hai que dezir que alguns son studantes i nun se amportórun de cagar las manos.
La direçon i tequenicos
La amisade que se criou antre todos fui mui amportante. Las cousas nun acuntécen por acaso, mas porque ls sendineses quando béien que hai respeito i buona ourientaçon son l pobo mais trabalhador i mais solidário. Ye cun giente assi que Sendin ye i bai a cuntinar a ser grande.
La mesa i al fondo Eizidro
Las cozineiras
L Jantar fui ne l restaurante Ancontro, bien serbido por Eizidro, que ye l restaurante de Sendim i un de ls de toda la region que mais bino gasta de la Copratiba.
Drento de alguns dies las pessonas yá ban a poder cumprar ls pordutos que quejíren, de ls que bende la Copratiba, por cunta de las ubas que metírun alhá. Ye ua maneira de ampeçar yá a pagar las ubas.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
