Quando deziemos que Sendin ye ua tierra special, nun ye solo por falar, mas porque ye mesmo special an todo. Yá mais que ua beç bos tengo anformado de cousas que poucos sáben i que outros nin eimaginában que habie an Sendin. Sendin ten ua Associaçon de dadores de sangre.
Las anfermeiras a reculhéren l sangre
Esta Associaçon ten muita giente associada i dá sangre bárias bezes por anho. Quando ye perciso ou stá programado, ben ua eiquipa de l Porto a recolher l sangre. Bénen bárias anfermeiras i médicos i todo se faç cun todo l cuidado i cun todo l eiquipamento neçairo.
Un dador a ser bisto pul médico
Ua dadora a se eisaminada tamien
Purmeiro, ls dadores fázen la anscriçon para dar l sangre i apuis ban para la sala onde se tira l sangre. Todo ye montado ne l quartel de ls bumbeiros. Para la sala de tirar l sangre outeliza-se l salon de l quartel, porque ls dadores son siempre muitos i hai que tener spácio para montar todo l eiquipamento.
A fazer análises
Antes de dar sangre son bistos por ls médicos i por ls analistas i solo apuis de se saber que stan an cundiçones de dar sangre ye que ban para ls sítios onde se recuolhe l sangre. Mas antes inda pássan por ua mesa onde hai que comer, para aqueilhes que ls médicos mándan, podéren comer algua cousa.
Ua dadora a comer
Todos estes sendineses i sendinesas i inda ls dadores de las aldés alredor de Sendin, que tamien pertenécen a la Associaçon ou boluntairos, stan a mostrar que Sendin ye un grande centro de todo, até a dar l sou sangre para quien percisa. Tenemos defeitos cumo todos, mas debemos tener ourgulho de ser Sendineses.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
