Stamos ne l tiempo de la caça i onte tamien fui a ber cumo ye passado hoije un die de caça. Hai muita giente que nun gusta que se cace i hai outros que nun puoden passar sien caçar. La caça puode ser cunsiderada un çporto ou ua maneira de fazer turismo. Nun bou eiqui çcutir esso, porque l HOIJE ye para dar las nuobas.
Un perro a buscar
Por l que onte puode ber, hai cousas buonas i outras malas. Anquanto la lei permetir la caça i cumo stamos nun paiç de dreito, cada un ye libre de caçar ou nó. Acumpanhei ls caçadores i aporbeitei para passar un die por l termo i quedei cuntento, nó por la caça, mas por haber tenido la ouportunidade de andar por l termo.
Las quelores de Outonho
Las quelores deste tiempo
Quien nun queda ancantado cun estas quelores? La caça puode ser ua cousa buona se ls caçadores nun pensáren solo an matar la caça, mas se aporbeitáren l die para andar i fazer eisercício físico i miráren bien para las quelores i la paisage que ban ancuntrado. Ye ua marabilha i mesmo sien se ser caçador, todos deberíen ber. You gusto de l campo.
Un caçador cun ua raposa
L home fui siempre un caçador i l anstinto ben al po riba de todo i caçar ye muitas bezes ua necidade. Poucos coneilhos i perdizes bi als caçadores, you nun matei nada, mas cheguei a casa feliç porque habie balido la pena por la paisage i la caminada.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
