Por este anho acabou la bendima i mesmo sendo un anho de poucas ubas, inda se metírun na Copratiba mais de 2 000 000 de quilos de ubas. La culidade fui buona i mais un anho de binos que ban a tener buona benda. Todo corriu bien i naide se friu que fui l mais amportante.
L’último trator
Staba na Copratiba quando chegou l último trator i sperei para tirar l retrato al çcargar de l último cuntentor de ubas. Puode parecer ua cousa sien amportancia, mas cuido que d’hoije para lantre ua nuoba bida ampeçará para la Copratiba. La campanha de l anho que ben yá será feita por outra direçon i muita cousa demudará.
La çcarga de l último cuntentor
Houbo alguns associados que por tenéren porblemas de salude ou séren yá de eidade i nun tenéren quien l fazisse la bendima, pedírun ajuda a la Copratiba i fui esta que le fizo la bendima. Copratiba tamien quier dezir copraçon i ye esso que eilha faç.
Un trator cun ubas de la Copratiba
Questuma dezir-se que até l labar de ls cestos inda ye bendima, mas para la Copratiba l trabalho nun acaba cun la antrada de ubas, inda hai que acabar de çcargar las cubas que stan cun bino tinto i mandar l bagaço para la stilarie.
A cargar un camion de bagaço
Manhana ampeça la labage de todo l que yá nun percisa de trabalhar até l anho que ben. Apuis outros trabalhos ampeçarán, la Copratiba nun para. Para ls que ténen eideias ou sáben mais que pénsen que an Maio hai eileiçones.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
