Quando la bida bai mal i l mundo enrta an deficuldades, la giente arranja soluçones para ls sous porblemas i ls sendineses yá stan habituados zde hai melhares de anhos a bibir cun mil i un porblema. Por esso, mesmo quando se fala an gripe de las abes, inda cuntínan a criar pitas.
Que pitas tan galanas
D’atrás quaije todo la giente criaba pitas, muitas son las stórias que hai subre esso. Era anteressante cumo la giente tenie las sues perferidas, you inda me lembra de oubir las ties falar i uas dezíen que las de l cachaço pelado éran las melhores, outras dezíen que éran las pedresas, mas todas gustában de tener de todas.
Ua pita pedresa
Ua de cachaço pelado
Mas toda la giente gustaba de tener un galho pimpon cumo l de l retrato. Mas habie que atender als ditos.
Siete pitas i un galho,
Comen tanto cumo un cabalho.
Ou
Pouco oche i muito coche.
L galho i bin formoso
Mas las pitas éran tamien mui amportantes porque ponien ls uobos i habie un dito que classeficába las pitas.
Pita que pon na bendímia,
Ye rainha!...
La que pon na sementeira,
Ye rainha anteira!...
Stamos ne l tiempo an que las pitas se despónen.
