Sendin fui a Alfandega, ne l segundo jogo de l çtrital i perdiu por 1-0. Cumo podeis ber por ls retratos, quien ye probe ten siempre mais deficuldades. Yá quaije todas las eiquipas ténen campos cun yerbe i nun y ela mesma cousa, jogar nun campo desses ou nun de tierra batida cumo l nuosso.
L campo staba guapo
Agora stan a fazer l de Miranda i l Mirandés ben a jogar ne l nuosso campo. Bamos a ber se an stando pronto l de Miranda, mos pónen yerba tamien ne l nuosso.
Mas mesmo nun stando habituados ls jogadores de Sendin jogórun melhor i durante la purmeira parte poderíen tener marcado pul menos três golos, mas l guarda-redes de l Alfandega portou-se bien i fui tamien ajudado por la suorte.
.jpg)
L Alfandega nua de las poucas bezes que fui a la baliza de l Sendin
.jpg)
L Sendin a porparar mais ua jogada de ataque
Todo parecie que na segunda parte l Sendin acabarie por ganhar l jogo, mas lougo al ampeçar la segunda parte, l Alfandega marcou un golo i nada mais fizo que segurar l resultado. Sendin inda tubo dues oucasiones para marcar, mas ls abançados stában nun die malo i l resultado acabou assi – 1-0 a fabor de l Alfandega.
.jpg)
La jogada de l golo de l Alfandega
.jpg)
L Alfandega a ganhar todo fazie para parar l jogo
Ne l futebol yá todo mundo diç que quando ua eiquipa nun marca quando l puode fazer, acaba por perder. Fui l que acunteciu.
L Mirandés jogou acá i ganhou 3-2 al Bila Flor. Fui un jogo eiquelibrado até al fin, mas l Mirandés nunca zistiu i acabou por ganhar yá ne ls minutos finales.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
