Todos ls anhos por esta altura se faç ua montarie als cochinos brabos que yá ban sendo muitos i hai que ls ir cuntrolando para nun dáren cuonta de las huortas i outras culturas i até de ls nius de perdiç i de las conelheiras.
L’almuorço
L’almuorço
Por la manhana ajúntan-se ls caçadores, na casa de la junta i fázen-se las anscriçones i l sorteio de ls sítios para onde cada caçador ten que ir. Lougo que chega la matilha de perros que bai a fazer la batida ye serbido un almuorço a todos.
L grupo de caçadores
Cumo l nuossso termo ye mui grande i las arribas ténen bárias ribeiras, hai que fazer la batida por dues bezes, ua para ls lados de l Corço i outra para l lado de Mundin. La purmeira acabou cerca de las dues de la tarde i caçou-se un cochino brabo.
L cochino brabo
Cumo era macho houbo que l capar lougo, para la chicha nun agarrar malo gusto.
Durante esta purmeira batida i para dar rezon al nome, bírun-se alguns corços, que yá ban aparecendo alguns por las arribas.
A la Mal-tapada ajuntórun-se ls caçadores, para se ourganizar la segunda batida.
Porparados para ir para ls sous sítios
De la Mal-tapada salírun ourganizados i fúrun para ls lados de Mundin para la segunda batida. Todo corriu bien i naide se feriu, mas solo se bírun alguas raposas, que cochinos brabos habien zaparecido.
A las seis acabou todo ne l salon de la Junta onde fui serbido l jantar.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
