Hoije ye l die de ls correios, an todo l mundo i you nun querie deixar passar este die, sien dar mais ua liçon subre la stória de Sendin. Nun bos podeis ademirar porque cumo fui porsor inda tengo l bício de dar liçones. Cumo sei que la maiorie de ls que léien l HOIJE, l gusta saber estas cousas ou lembrar-las acá stou you a screbir.
Onde era l correio quando you era garoto
Era nesta casa, que yá fui sede de la Junta de Freguesie i de bárias associaçones i que agora stá a ser cumpuosta para ser la Casa de ls Ouficios, que stában ls correios. L correio benie ne l camboio i traien la saca nun burro até al correio, onde éran apartadas las cartas. L camboio chegaba yá quasque de nuite i ajuntabamos-mos a la puorta de l correio a la spera.
Selos desse tiempo
Anquanto sperábamos, ls garotos íbamos jogando a “Romeu, Romeu”, a “arrinca nabiça”, a “ ua de la mula”, al “sconde sconde” i cumo habie tamien homes a la spera, estes falában de la bida, tamien habie mulheres, amouchadas cun ls xailes, que sperában nuobas de ls filhos ou de ls homes que stában loinje. Tamien habie homes que cumo tiu Manel sapateiro, que fazien caçuada de ls garotos, cumo a fazer que l tiraba l gogo.
Jé carteiro
You conheci bários carteiros, cumo Carlos Arteiro, tiu Abílio carteiro i l que stubo mais tiempo, Jé carteiro. Ende l teneis ne l retrato, agora reformado, mas inda bai tratando de la huorta de l Bergel. Hoije l correio ye nua casa de Camino Prado, yá cun outras cundiçones.
Onde ye l correio hoije
D’atrás las cartas inda éran dadas a la nuite, apuis de apartadas i cumo nun habie luç, era cun un petromax que alumbrában la staçon de correios, acá fuora era nuite scura i anton l carteiro iba lendo ls nomes para quien habie correio. La garotada, nun se calhaba i a las bezes alhá biemos a Jé carteiro a dezir que yá nun lie mais.
Hoije ye ua cousa mais moderna
Muito habie que dezir subre todo esto, mas eiqui solo bos fago lembrar essas cousas, mas starei siempre pronto a dar las anformaçones de l que sei a todos ls que quejíren saber todo esto de ua maneira mais cumpleta.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
