Fui ua besita de studo de ls alunos de l nono anho de l Ciclo de Sendin a la Copratiba, durante la campanha de la bendima, para béren cumo funciona la Copratiba i cumo se faç l bino. Claro que fui solo para tenéren ua eideia de todo l camino de la uba zde que entra até que se tranforma an bino.
L porsor Bitor a splicar cumo se tira l grado
A béren cumo se faç la çcarga de ls cuntentores
Fúrun acumpanhados por l Secretário de la Direçon de la Copratiba, Vitor Rodrigues, que tamien ye porsor i que splicou todo l funcionamiento de la Copratiba i las bárias eitapas de la tranformaçon de la uba. Muitos alunos, mesmo sendo alguns de Sendin, nun tenien la eideia de cumo todo se passaba.
Onde son zmagadas las ubas
Yá onde sale l mosto
Junto als balones onde formenta l bino
La porsora iba aporbeitando todas las splicaçones para apuis, al outro die, na sala de aula, poder zambuolber l tema cun ls alunos. La scuola solo puode caminar para un ansino de culidade, se abrir las sues puortas i salir caras a la bida strior i cun l apoio de las anstituiçones, tornáren l ansino ligado a la bida de l die a die.
Apuis de feito, onde se ínchen las bag-in-box
L trabalho de las meter nas caixas
L ansino drento de quatro paredes nun sirbe para nada ou sirbe para pouca cousa. Naide gusta de star preso i muito menos ls moços i moças. Para ls motibar, hai que fazer cun que eilhes síntan i beian l lado prático de l que daprénden. La scuola ten que ser atiba i alegre i solo assi ls alunos se puoden sentir bien drento deilha.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
