Nun son solo las grandes eiquipas que pássan por deficuldades, tamien l Sendin stá a passar por eilhas. L G.D.Sendin fui siempre ua de las eiquipas mais fuortes de l çtrital de futebol, mas passa agora por un tiempo de renobaçon de la eiquipa, l que trai siempre porblemas, mas cumo ls jogadores son nuobos, drento de algun stará ne l sou melhor.
L purmeiro golo de l Bomioso
L jogo de hoije fui acontra l Bomioso i Sendin perdiu por 4-0. La falta de spriencia i la buntade de ganhar fizo la eiquipa de l Sendin, que ampeçou a perder por 1-0, adelantrar-se para poder ampatar i tubo todo para l haber feito, mas falhórun cun todo para marcar i quando assi acuntece, nun se puode ganhar.
L Sendin todo fizo por ampatar
Na segunda parte l Bomioso que jogaba an contra-ataque, fizo l segundo golo i a partir dende l Sendin zanimou. Ls jogadores son nuobos i percisában de l apoio de ls sendineses, mas l que se biu fui uns poucos parecéren de Bomioso. Nunca se bei an nanhun campo l que se biu hoije na Sendin.
L Bomioso jogaba atrás i speraba las falhas de l Sendin
L Sendin cuntinou a atacar, mas l Bomioso staba atento
L Bomioso, cun jogadores sprientes aporbeitou todas las falhas de l Sendin i cun la ajuda de alguns sendineses, marcou mais dous golos. Ls jogadores de Sendin séren tratados cumo fúrun onte, solo tenien ua cousa a fazer, ir a la bancada antregar las camisolas i mandar jogar ls que ls tratában mal.
Ls jogadores nun son porfissionales, ye tiempo de respeitar ls outros, inda mais quando alguns de ls que boziában, antrórun de grácia i inda nun pagórun las cotas al clube. Inda bien que you nun staba alhá.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
