La eiquipa de la câmara que stá an Sendin, anda por fuora, mas an Sendin hai outra eiquipa de la câmara. Tráen todo l que faç falta, de Miranda i esta eiquipa de cantoneiros anda a remendar las rues. Fui a ber l que andában a fazer i cumo l fazíen.
A trabalhar na rue de la Lingoeiras
Cumo l alcatron se bai zgastando cul tiempo i por bias de alguas obras que se fázen a meter la auga ou l saneamento, ye perciso tapar ls buracos que ban aparecendo. Chamo-le you remendar las rues. Agora esso yá se faç de ua maneira mais fácele, puis l alcatron ben yá porparado i ye solo botar cola ne l suolo bien limpo, botar l alcatron i celindrar.
L alcatron
La cola
Ls remendos siempre se dében botar por esta altura de l anho para eibitar que quando chegáren las chubas de l Outonho, las rues nun se stráguen. Falei cun ls cantoneiro i cumo todos son de aldés de Miranda, falemos an mirandés. Quedórun cuntentos por falar an mirandés i cumo nun podie deixar de acuntecer falemos de las çfrências de l sendinés i de la fala de las outras aldés.
A celindrar l alcatron
Quando l tirei l retrato, lougo perguntórun se era para poner ne l HOIJE. Tamien me dezírun que por todo l cunceilho fálan ne l HOIJE i ne l porsor Almendra i que todas las aldés habien de tener ua pessona assi. Eilhes yá me coincíen de quando fui bareador i perguntórun-me se inda tornaba a ir para la câmara.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
