Stamos ne l tiempo de cebar ls cochinos porque l més de Dezembre chega debrebe i hai que tratar bien ls recos. D’atrás quaije toda la giente cebaba l sou cochino i hoije inda hai muita giente que l faç, mas las eisegências son tantas que faç zanimar muita giente. Nun debemos ser acontra la defênsia de la salude, mas l que ye demais ye moléstia , cumo diç l pobo.
Dous recos caseiros
Quando era mais nuobo inda se me lembra de cumo se tratában ls cochinos i muitas bezes me apeteci estar na pie dun caldeiron a cozer la bianda i poder tirar uas patatas para comer. Iba-se a fuolha i a yerba para ls cochinos. Fuolha d’uôlmo i bordelagas. Ls uôlmos dou-le ua malina i secórun-se, la yerba cun ls remédios bai acabando. Quédan las bóbedas i las patatas.
A cortar bóbedas para dar al reco
Falei cun la tie i dixo-me que solo l dá cousas que cuolhe i cumo you nun m’acreditei bien, amostrou-me l caçoilo de ls farelos. Nun le dá raçones, solo farina de grano molido, para ajuntar a la bianda, la bóbeda si la dá sin cozer, mas diç que eilhes bien la ruoben.
A mostrar l caçoilo
Quando staba a porparar ls retratos lembrei-me de bos screbir ua ouracion que ls moços, que íban a yerba para l reco, rezában al passar por la capielha de San Sabastian. I bou a screbir-la an SENDINÉS, cumo la screbiu l Pe. Mourinho.
Sã Sabastiã!...
Dá-me del pã!...
Yâo bâo a eirbas
Pal tâo cutchinôikho
Apúis ã l matando,
Dás-me del rabôikho
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
