La Casa de la Criança Mirandesa, ye ua anstituiçon de las mais amportantes de l cunceilho i até de l Çtrito. Para ls sendineses ye coincida cumo Asilo, porque siempre fui ua casa de acolhimento de crianças. Chegou a tener un coleijo, mas quando fui feito l Ciclo, l coleijo mudou para Chacin.
L Asilo an obras
Hoije cuntina a recebir moças que nun ténen familhia ou que ténen ls pais loinje. Ten l Lar de ls bielhos, que ye outra obra mui amportante para Sendin, porque para alhá de Lar, dá tamien apoio a pessonas que, bibindo an sues casas, percísan de ajuda.
La huorta
Cumo ten un grande terreno, tamien ten ua huorta onde cuolhe muito de l que percisa para l comer. Stube alhá i bi l ancarregado a colher alho porro i tirei un retrato a las berças de ambierno i que tan buonas son para comer cul bacalhau ne l Natal. Stában bin criadas i éran de buona culidade.
Las obras an drento
Eiqui bai a funcionar ua creche
Fui alhá porque stan a fazer las obras para ua creche, que tanta falta faç para ls pais podéren deixar ls ninos pequeinhos, anquanto ban para l trabalho. La bida hoije ye mui çfrente i hai necidades que datrás nin se falában neilhas.
Sendin ye ua tierra siempre an eiboluçon i ye amportante que ls que stan loinje, se déien cunta desso i que téngan ourgulho na sue tierra i ne ls sendineses.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
