Todos ls dies hai cousas nuobas i amportantes an Sendin. Quando todo mundo se mata a falar ne ls porblemas de la eiconomie, Sendin parece nun dar por eilhes. Siempre ls sendineses tubírun la fama de trabalhadores i homes para la bida. Ye cierto que cumo an todo hai eicessones.
Onde ampeça l camino
Ye berdade que hai por ende ls que nun fázen mais nada que lamentar-se ou falar de miséria, mas son eilhes ls que melhor bíben i que mais denheiro ténen. Cumo l arranjórun, nun sei, mas l que me ademira ye que stan siempre a poner-se al lado de ls que percísan i sien que naide ls chame.
Mas las obras cuntínan
I hai ls que trabálhan
A las bezes penso que ye para que naide se dé cunta de la bida deilhes. Mas bamos a falar de trabalho i l que se stá a fazer ne l camino para l Pilo. Ye ua de las obras mais amportantes que se ténen feito, an Sendin, zde hai alguns anhos para cá. La Junta cun la ajuda de la Câmara stan a fazer un camino que bale tanto cumo fazer ua zona andustrial.
L camino yá ampeça a parecer
Este camino bai de la Fachaç até al Pilo, ne l camino que sale an Cabeço alumbreiro, un pouco a la frente de la fuonte que queda junto de la strada. Para fazer ua zona andustrial, éran percisos tantos porjetos i tanto papel que l que se habie de gastar nesso, chega para fazer l camino i ne l fin tenemos cundiçones para se anstaláren muitos que l quérgan fazer.
Mas hai que arrebentar fragas
Puode haber muita çcuçon subre esto, mas las feitas ye que bálen.
L HOIJE dá las nuobas, las çcuçones son para ls políticos ou para ls que nada fázen i stan solo a ber onde se puoden agarrar para se mostráren.
Screbi d’aporpósito, Cabeço Alumbreiro, porque antendo que l nome berdadeiro ye esse. Nun puode ser cabeça nin lebreira i muito menos lubreira.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
