Al dezir bejitou talbeç nun seia la palabra mais cierta, inda que quien ben acá seia siempre ua bejita querida, porque el bino a trabalhar, a fazer ua reunion cun las associaçones de l Praino i muitas stubírun presentes. Cumo yá bos habiemos dito onte, stubimos cumo órgano de anformaçon local i cumo persidente de la Compratiba.
L diretor cun ls membros de la Junta de Freguesie
Muitos i bariados fúrun ls porblemas apresentados por las bárias associaçones sendo l de la seca, que ne ls meses de Márcio, Abril i Maio afetou la nuossa region, l que mais preacupou ls agricultores, representados por las sues associaçones. Bárias culturas fúrun afetadas, mas ls pástios sofrírun mais, traendo porblemas a la criaçon de animales, bacas, canhonas, cabras..
Ls representantes de las associaçon de animales
Al afetar ls pástios i la criaçon de animales afeta tamien la produçon de lheite i tamien esso fui referido, assi cumo l porblema de la seca para la produçon de azeite i bino. Mas la reunion tratou tamien de outros porblemas, cumo ls seguros, l RPU i las ajudas de l QREN 2007/2013.
Ls representantes de outros setores
L diretor nun prometiu nada i inda bien, porque solo se debe pormeter ls que se puode dar, mas antre todos chegou-se a un acordo subre l que se poderie fazer i agora cabe al goberno fazer la sue parte. Son estas einiciatibas que fázen acraditar las pessonas, trabalhar para resolber ls porblemas i nó para telbisones i jornales.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
