Fui onte la fiesta de San Sebastian, mas cumo l die nun staba mui buono, nun fui possible tirar retratos de todo, por outro lado yá l’anho passado se falou de la fiesta i hai que dar la nuoba i falar de outros aspetos de la fiesta para nun andar a dezir siempre la mesma cousa.
La fanfarra de ls bumbeiros fizo l peditório
La fiesta de San Sebastian era ne l Berano i fui ampeçada puls benediços (sendineses que nun nacírun acá, mas que passórun a ser sendineses por bias de l casamento ou de habéren feito de Sendin la sue tierra para bibíren). La purmeira fiesta fui an 1943, de que miu pai fui mardomo tamien. Apuis fui-se fazendo alguns anhos, mas bino a perder amportáncia, porque la berdadeira fiesta de ls sendineses era la de Santa Bárbela, lougo a seguir a la fiesta de la Trindade , tiempo de las troniadas. Cumo sabemos, Santa Barbela ye que ye la patrona de las troniadas. Habie ua cierta ribalidade antre las dues fiesta i cuntan-se muitas stórias de que Santa Barbela nun gustaba que la fiesta de San Sebastian fusse maior, donde haber sido un raio que partiu la cruç de la capielha de San Sebastian i de l arraial acabar muitas bezes por nun se fazer por bias de las troniadas.
La fanfarra ten eilementos bien guapos
Nun gustamos de screbir nuobas mui grandes porque nun hai muito tiempo para ler grandes testos, mas hoije pedírun para screbir algo mais i ye l que bou a fazer. Cuntinando cun la stória de la fiesta, inda que resumida, cumo la fiesta de San Sebastian iba perdendo la sue bitalidade, les benediços quejírun tornar a dar fuorça a la fiesta i ne l anho de 1968, quando se fazíen 25 anhos de la purmeira fiesta de Berano, fazírun ua fiesta de arromba i cumo nesse anho staba an grande l grupo cénico de Sendin, houbo triato i todo. L triato fui siempre ua atibidade amportante an Sendin. Éran derigentes de l grupo cénico l Drº Manuel Rodrigues i António Camilo Almendra. La fiesta mantubo-se alguns anhos, mas tornou a caer, mas cumo ls eimigrantes éran muitos i beníen ne l Berano, nun podendo benir a la fiesta de Santa Barbela, resolbírun fazer-la ne l die de la de San Sebastian, segunda semana de Agosto. Quedou la fiesta de San sebastian a ser die 20 de Janeiro ou ne l Demingo a seguir, que ye l die de San Sebastian.
La nuoba ambulância
Ne l anho de 1976 fuomos nós mardomos de San Sebastian, cun l nuosso cumpanheiro Alfredo Nobre i cumo presidente de la Junta de Freguesie, de que éramos nesse tiempo, resolbimos fazer, para alhá de la fiesta de l die 20, ua fiesta cun missa campal, na capielha i scolhimos l die de la fiesta de Santa Barbela. Cumo l denheiro era pouco i nun habie las facelidades d’hoije pedimos al pobo para aceitar musiqueiros a almuorçar i assi, ne l die de la fiesta tubimos la ajuda de la banda de Miranda, que bino a fazer l peditório. La fiesta cuntinou a fazer-se até que, sendo nós tamien de la direçon de ls Bumbeiros i porque l patrono deilhes ye San Sebastian, estes la passórun a fazer. Todos ls anhos ls Bumbeiros ténen batizado un carro neste die, este anho fui la ambulância pré-hospitalar.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
