Tomou posse hoije, de l lugar de Diretora de l Agrupamiento de Scuolas de Sendin, la drª Ana Luísa Miranda Pombo, que yá habie sido secretária de l eisecutibo ne ls anhos de 1997/1999 i bice-presidente ne ls anhos de 2004/2009, ye portanto ua pessona cun spriéncia para l lugar.
L cunseilho-giral de la scuola
Para alhá de la spriéncia adeministratiba ten l curso de Specializaçon pós-licenciatura en Necidades Eiducatibas Speciales, licenciatura en Eiducaçon Bisual i bacharelato en Porsores de l Purmeiro Ciclo de l Ansino Básico i bacharelato en Eiducaçon Pré-scolar l que le dá saber para lidar culs bários setores de l ansino na nuossa scuola. L HOIJE dá-le ls parabienes.
La nuoba diretora falou apuis de la posse
Para trabalhar cun eilha, scolhiu ua buona eiquipa, la drª Cremilde Carção i la porsora Justina Ginjo. Que zde este die para lantre trabálhen para l bien de la nuossa scuola i que porcúren trabalhar cun toda la giente i sában ser houmildes, que ye la maior birtude que púoden tener, inda que téngan que ser firmes. Nós acá staremos para las ajudar an todo.
Ne l fin houbo bolo i un porto de honra i la diretora i restantes eilementos ampéçan a trabalhar bien
Para l diretor Jorge que acabou hoije l sou mandato porque se bai reformar, ban tamien ls nuossos agradecimientos, por al longo de ls muitos anhos que stubo antre nós cumo porsor i mais de ua dúzia cumo presidente de la scuola, la serbiu cun muita fuoça i carino. Sendin i alredores atrabeç de l HOIJE, deixa-le un BIEN HAIA porsor JORGE.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
