Las scuolas de sendin ténen ua nuoba biblioteca, yá oufecial i que fui einaugurada por l representante de la DREN i ls respunsables por l’ansino i la rede de bibliotecas de l çtrito. La anstalaçon de la biblioteca tubo muita giente a colaborar zde ls ampregados als alunos i porsores, mas l porsor Gonçalves i la porsora Orquidia merécen l nuosso oubrigado.
La porsora Orquídea a dar ls prémios als alunos
Ls alunos
La einauguraçon ampeçou por la nuoba diretora fazer la apresentaçon que lougo passou la palabra al diretor que acababa l sou mandato, para que falasse el yá que fui l respunsáble percipal. Al porsor Jorge deixamos eiqui l muito oubrigado de todos ls sendineses por l buono trabalho que fizo.
La nuoba diretora a fazer las apresentaçones
L porsor Jorge falou subre l trabalho de anstalaçon i agradeciu a todos ls que colaborárun.
A seguir falou l representante de la DREN i la respunsáble por las bibliotecas ne l çtrito assi cumo l bice-presidente de la câmara, ang. Tomé al que se seguírun bárias atuaçones de ls alunos de la primária i de l ciclo, cantando ou declamando poesies. Fui un momiento de cultura, que queremos que cuntine.
L representante de la DREN a falar
Las alunas a recitar
Mais ua obra queda an sendin para que ls nuossos alunos púodan daprender l gusto por la leitura i por la cultura, bases de ua sociadade mais eibeluida i mais capaç de fazer un feturo melhor.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
