L HOIJE tenie reserbado para la ambora de l die, l’apresentaçon de ls libros an mirandés, de Amadeu Ferreira cun zeinhos de José Ruy i que tubo lhugar ne l Porto, na ANJE (Associaçon Nacional de Jobes Ampresários), mas por motibos amprebistos, la apresentaçon que staba para las 18h30 atrasou i l HOIJE nun puode quedar para alhá de las siete i meia, por motibos profissionales.
L libro
Mas stubimos tamien an outros sítios para bos dar las amboras de l que se bai passando ou de l que bai a passar. Sabendo de ls cuncursos de pesca, de manhana an Palaçuolo i Sendim, fumos a ber ls locales i quedemos ademirados cun la ribeira de las Tortulhas, an Palaçuolo, sitio bien amanhado i que ye local a besitar ne l Berano.
La ribeira de las Tortulhas
I por falar an Berano, perguntemos a esta moça, que miraba l ancanto de las arribas se era nel que pensaba.
- Inda solo penso na Primabera, arrespundiu-mos eilha, mas pul que sei, entra manhana.
- Berdade, dezimos nós, manhana acerca de las 6h de la manhana.
La moça mirando las arribas
Tamien Sendin faç l cuncurso de pesca i haberá eisercicios de salbamento nas arribas i ne l riu, para treino de ls nuosssos bumbeiros. Tamien ne l Naso haberá l Piquenicon de l tiu Juão, un ancontro de todos ls ami(g)os de la rádio regional de l tiu João i que todos ls anhos ajunta melhares de pessonas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
