Ye este un nome a guardar porque bai a ser ua de las atraçones turísticas mais amportantes de l Praino. Pouca giente saberá la stória de la Senhora de l Picon i de las apariçones de que siempre se falou na Pruoba i alredores, mas ténen sido eignoradas d’apreposito ou nó. Nun bamos a tratar de saber se ye berdade ou mintira, mas ye ua tradiçon cumo tantas outras.
La Senhora de l Picon
Antre la Pruoba i l Naso hai un fuonte d’auga que la giente siempre dixo que era buona para la salude. Tamien siempre houbo ua lienda subre uas apariçones de Nuossa Senhora nesse sitio, rezon porque l cháman la Senhora de l Picon. Un die destes yá publicarei toda la stória que zde 1972 tengo scrita.
La eigreija de la Pruoba
Por todo lado ls sítios adonde hai auga buona son aporbeitados para acrecentar balor a la region i anton se al miesmo tiempo hai outras rezones, cumo ye l caso desta auga, mais rezon haberá para tornar l sitio un puonto turístico amportante.
L Naso yá ye un sitio a besitar
I cada anho stá mais guapo
Pus ye un porjeto turístico que bai a cuntar cun todo l que hai alredor de l cabeço de l Naso, ancluindo la Senhora de l Picon i la naciente d’auga milagrosa, que será feito para bien de l Praino i de las sues gientes. Zafiamos l goberno i la câmara a cuntribuíren cumo ye d’oubri(g)açon.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
