Todos ls anhos ls ami(g)os de l tiu João, que faç un porgrama de rádio todas las manhanas na RBA, fázen un cumbibio que ajunta melhares de pessonas. Ye un acuntecimento que yá ye coincido i falado an todo l mundo, cumo un de ls mais amportantes fenómenos de adeson popular.
La giente era muita
I ls carros tamien
De todos ls sítios hai giente que nun perde l piquenicon. Adonde chega la rádio, ban-se ajuntando todos ls anhos nuobos oubintes al mobimento i atrabeç de l porgrama ban criando amisade i ban se coincendo. De tal modo l mobimento se bai cimentando i alargando, que hai giente que cumbibe hai muitos anhos i hai yá filhos i nietos de l purmeiros, que cuntínan.
La giente a la buolta de la Senhora de l Naso
La musica tradecional nun falta
Po regla scúolhen siempre un sitio nomeado para fazéren l cumbibio i este anho fui l Naso onde rezórun missa i besitórun la Senhora de l Naso, reina de l Praino. Yá ye questume quemer la merenda naquel sitio i alhi partelhórun las sues merendas, tocórun las sues musicas i cumo tamien ye uso nestes ajuntouros, nun faltou la feira.
Por las selombras comie-se la merenda
La feira era grande
I habie fruta de todas las culidades
Todas estas manifestaçones son amportantes i tamien ajúdan a cumbatir la crise, por un lado porque aníman la giente i por outro porque fázen andar la eiquenomie, yá que l comércio faç siempre aumentar la ouferta i la porcura de las cousas.
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
