Alguns pais ténen miedo que ls filhos fágan parte de grupos de scalada, porque nunca persenciórun ua scuola de scalada an funcionamento, ls alunos tamien tenien algun miedo, inda que la buntade de daprender fusse maior, mas por algun lado habie que ampeçar i fui l que fazírun ls porsores de l Ciclo i ala de ir até Picuote a fazer scalada culs alunos.
Ls porparatibos para ampeçar
L purmeiro oubjetibo ye acabar cul miedo i, para esso, serie amportante cumbidar ls pais a scalar cun ls filhos ó, a assistir a ua sesson de scalada, mas cumo esso nun ye mui fácele, l HOIJE amostra l que fui la scalada para ls pais béren. L ansino de ls alunos fui l que stais a ber ne ls retratos.
Ls ansaios
Cun este método, cudamos que ls pais acabarán por berificar que, afinal, ls meios outilizados son siguros. Alguns, cumo nós, ampeçamos até a gostar de ber regularmente, yá que praticar yá nun mos será fácele. Inda antentórun fazer-mos sprumentar, mas la salude tamien yá nun acunselhaba.
Yá perdírun l miedo
Este parece porfissional
Scalar ye un daqueilhes çportos que eisígen eiquelíbrio, cuncentraçon, cuntrol mental i corporal, bisualizaçon i eimaginaçon para ls mobimientos. Ye buono para manter la forma psíquica i física.
Estes son ls percípios básicos para ls ampeçados na scalada :
• 1 - Daprende bien l nuolo de ancordamento de l Baudrier a la cuorda.
• 2 - Na peinha usa siempre l capacete.
• 3 - Nunca ampeces a scalar sin abisar l tou colega que dá sigurança.
• 4 - Alerta l tou segurador siempre que la cuorda steia folgada al ampeçar.
5 - Oube cun atençon las anstruçones de l tou mestre. Nun le respondas nin te justefiques!
abiso : este testo stá screbido an sendinés, bariadade de la léngua mirandesa i, por esso, nun ten lh- an ampeço de palabra i, antre parénteses, aparece (g) que nun se lei, inda que l -on se leia –ão.
